旅行日記: 5月 2016

2016年5月26日星期四

遼東掠聞之五

第六、七日

行程最後一日，5月11號終於黎到自己諗都冇諗過會黎嘅地方，中國最大嘅邊境城市，中韓邊界交匯處-丹東。雖然我住嘅地方唔係丹東，而係一個叫北井子嘅小鎮，離丹東西面五十幾公里。

北井子站外，左邊係農田，右邊係被填嘅農田，準備發展，強國真係強，發展是硬道理呢句話真係禍國殃民。

到埗時已經下午五點幾，我第一時間就係去左沖涼，因為兩日都冇沖涼喇!但兩日冇沖涼都唔係重點，重點由金州轉車個時拎住三件大型行李行到成身汗，唔沖涼真係會危害到公共安全。

我覺得自己呢趟行程都算係好幸運，除左識到Ginny同領導佢地咁犀利嘅人物之外，我係丹東更加遇上一個我覺得係傳說級嘅人物，佢就係梅偉義先生(David Melville)，原來佢同其他研究人員而家係丹東鴨綠江做緊水鳥研究，今次真係不枉此行!

呢度就研究團隊係北井子嘅住處，情況都幾理想架，有涼沖有WIFI，我登記果時見到東主個女仲睇緊日文版海賊王架。可能係香港人關係，東主話我地呢D「外國人」最好都係去派出所登記一下好啲，唔使咁嚴重掛?雖然我都冇去到

當晚咁岩佢地係泥灘執到隻岩岩死左嘅大濱鷸，死因不明。最記得係梅先生教左我地點樣分辨隻雀嘅脂肪夠唔夠多，同埋一個好好笑嘅死因解釋:Why don't you accept that the bird has just suddenly died?同行另一位來自德國嘅研究員Rosena就堅持唔信死亡原因就係死左LOL，真係幾有趣，作為一個小薯仔嘅我就咁做CD ROOM喇。

傳說級嘅人物，梅偉義先生(David Melville)，我諗係咪咁多傳說級嘅人都叫David呢?梅先生喇，Sir David Attenborough喇，咁我都應該改返個英文名叫David Ho，沾下光!

除左梅先生同埋兩位來自外國嘅朋友外，我係呢度認識左領導嘅師弟，讀緊研究生嘅守楝，我到果日咁岩佢病左。同佢又幾岩傾，除左傾保育嘅事，就係傾國家大事，上至天朝，下至民間婚姻，近至香港現狀，遠至文革，無所不談。而佢亦都非常推薦我去丹東睇一睇，因為佢話今年鴨綠江嘅水鳥數量亦都係少得可憐，只有幾萬隻，到底佢地去左邊?冇人知......其中一個解釋係沿海泥灘嘅食物量大減，迫使本來集中出現嘅鳥群分散到各地覓食。

守楝佢主要嘅工作都係挖泥，搵底棲生物，同埋數旁蟹，呢個工作都幾辛苦。所以我真心敬佩每一位係野外做研究嘅人，因為每一位都係鐵人，日日早睡晚起，工作除左係體力勞動之外，仲要係單一沉悶，所以少啲毅力同堅持都做唔到呢份工作。

呢度就係梅先生同守楝主要嘅研究點，成個泥灘長約5公里，闊20公里，正正係鴨綠江出海口西面，每年都有數以十萬計嘅水雀係度聚集，仲有唔少種類係繁殖，包括左紅腳鷸(Common Redshank)、環頸鴴(Kentish Plover)同蠣鷸Eurasian Oystercatcher等

第二日破曉時份，原本行程係跟梅先生佢地出泥灘數雀同拍攝雀鳥，但因為天氣欠佳，泥灘吹七級風，咁樣係冇辦法落泥灘做野，行程取消，但守楝話佢已經冇出field兩日，堅持今日要做返，而我四點幾起左身又訓唔返，係旅館又冇野做，所以我同佢就坐車去左泥灘，佢去做野我去睇雀。點知去到泥灘，7級風真係唔講得笑，漁塘嘅水面俾風吹到好似有直昇機降落咁嘅情況，我真係覺得吹得頭都甩，仲睇咩雀呀，仲要冇雀俾我睇，我問佢真係落去?佢話冇問題，成日都係咁，習慣左。如果俾著我我就真係唔掂喇，所以真係好佩服佢地架!!\

雖然話當日天氣麻麻地，就咁望出去真係望唔到盡頭。當日又大風，守楝要係泥灘度俾風吹住行成個上晝，都真係幾辛苦，圖中右方個黑點就係佢，真係利害利害!

我冇落泥灘，跟車返左去，係間房坐到巴士開門就往丹東進發喇!

遼東掠聞之四

第五日

因為有事要於13號返港，所以未能同團隊繼續行程，呢日就要同大家道別，而我亦都得個一個任務，就係幫領導運送早前採集嘅樣本返研究基地－丹東鴨綠江。而佢地就繼續行程，向山東省東營黃河口進發。

蓋州站，國內一個普通嘅次級城市，冇咩特別。

出發前一晚先決定去丹東，因為大連到東營太遠，要由旅順坐船跨過渤海，全程6小時，我係13號中午飛，所以唔會跟佢地去東營。當時領導話左另一個令我震驚嘅事:傳聞強國要由旅順/大連起一條怪物橋到煙台/威海，全長150公里。哇，強國真係咩都做得出。我吹水話咁不如將旅順到煙台都圍起佢喇，分分鐘可以圍出一個渤海省，到時又有地發展LOL，點知佢仲吹得勁，可以由上海圍到南韓最南，將其中一少部份分俾南北韓，到時建立一個渤海國LOL。領導呢個人真係好正，做左近十年嘅研究，面對住呢啲咁絕望嘅現實，亦都只有咁樣講下笑，調侃一下。

係買飛時先知領導原來冇帶身份証，要搞個暫時証。佢係11號申請張証，但簽發日期竟然係9號，更神奇嘅係張証寫住可以用到23號，但有效期就寫住去到19號，呢個係咩邏輯?!

係2個鐘嘅車程，我地傾左唔少野，由佢地口中得知，原來國內嘅物種調查同埋從調查得出黎嘅數據大部份都唔可靠，由國家林業局至各省市大學嘅數據都唔可以完全相信。

什麼!國家林業局喔!國家級的數據都不能作實嗎?

是的。

為什麼?

以前的數據，比如說二三十年前，甚至更早時期的數據是可靠的，以前都是一些老學者，芾輩們花了一生，整個學術生涯在野外做工作，調查而收集的資料數據，這些都是他們親眼看見的，而且好多珍貴物種都是從深山老林裡記錄的，但現在的調查人員卻很多都是抄襲前人的記錄，或者是去到一個山頭，看到山路難行便望著山峰和隊員說:這麼大的山，裡面應該是會有XXX的，那就寫有記錄吧。然後就走了，完全沒有一個人親眼見到過XXX的，這就是現在大陸普遍的調查現象。而且之前央視還報導了，說鴨綠江現有共五十萬隻斑尾塍鷸，五十多萬隻呀，我做了這麼久還沒見過!造假也造得逼真點嘛，這報導下來，總是有人會相信的。

哇靠，那這樣還得了呀，明天我一定要去看看五十萬隻是什麼概念!XD

當我聽完佢咁講，我終於明白到點解早兩個月我同朋友去左廣州附近山林考察時，小隊隊長話大陸嘅雀鳥名錄唔太可靠，好多都係吹出黎嘅原因喇。

由大連往丹東沿路都係一望無際嘅平原同大河，自然環境睇落都幾好。車程中我睇到唔少野鳥，但因為車速太快同雀太細，根本唔知係咩黎XoX

大河之外，沿路係不盡邊際嘅田野，令我呢個生活係南方嘅山野村人大開眼界。

一大片防風林同漁塘，中間夾雜小村落，或許呢啲就係典型嘅東北農村。就係呢啲位置，我快速地剔左第一隻灰背隼(Merlin)

唔係講笑，當方圓幾里都唔見到有人煙嘅時候，你總會見到一座座冇人住但又起到鬼火咁靚嘅大廈。對於我呢啲廢青而言，北上置業不是夢呀!LOL

當火車到左金州，我地就要道別喇，我轉車往東去丹東方向，繼續餘下嘅一日行程，佢地繼續往大連方向。雖然大家只係相處左短短3,4日嘅時間，但
我覺得大家都幾傾得埋，下年一定要再去過。

2016年5月23日星期一

遼東掠聞之三

第四日

因為提早完成取樣工作，第四日已經冇咩好做，所以前一晚決定一早就去泥灘北面嘅位置數數雀，行程比較輕鬆，純睇雀。前果晚就協助領導整理下啲樣本同向Ginny大大傾計，從佢地口中得知好多有關大濱鷸同埋現今中國沿海嘅野鳥情況。

呢條係咩?沙蠶掛，呢樣就係泥灘雀主要嘅食物，另外仲有啲蝦、蟹同埋似蚯蚓嘅肥蟲，味道係點就唔知，但我信都應該好有營養嘅LOL

領導話大濱鷸吞唔到手指公咁大隻嘅蛤蜊，要再細隻啲先得，咁佢地都幾慘，嘴又唔夠人地長，口又唔夠人地大，但係又要食好多野先夠肥返西伯利亞，真係慘。

呢種大細先岩大濱鷸，要食好多先夠飽，就好似我地食飯咁，幻想下我地要一粒一粒米咁夾黎食，要食幾耐先夠飽?但水雀就係日日都要咁做，真係搵食艱難呀!

除左搵食係大濱鷸每日嘅挑戰之外，仲有一個更大嘅困難威脅佢地嘅生存，就係住屋問題。同人一樣，佢地都需要一個地方去棲息。因為佢地由西澳出發飛去西伯利亞，途中必須休息同補給食物，咁中國沿海泥灘就係佢地必停嘅中途站。唔講我真係唔知，因為近十年嘅破壞式發展，亞洲東部嘅泥灘已經被圍墾到支持唔到咁多水鳥生存。

呢度係新圍嘅漁塘，前身當然係泥灘喇，咁有大呢?圖片後方有啲建築物，個邊就係泥灘嘅起點，一直向海伸延五公里，Ginny話單一個漁塘面積已經有6平方公里，太恐怖喇......

南韓同中國係圍得最利害嘅國家，南韓個邊嘅大濱鷸補給地早已經因為開發而消失左，中國呢邊就正圍得興起，單係上海如東海岸嘅泥灘就被圍墾達160萬畝，160萬畝呀!!!等於1066平方公里，唧係幾大?香港總陸地面積有1105平方公里，即係成個香港可以搬過去。我真係呆左，圍黎做咩?一個目標係為左經濟增長，另一目的就係要增加耕地面積同綠色面積。地方官為左自己政治前途，將泥灘抽乾，起工業園，吸引大量工業進駐，而工業園嘅廢水可以直接傾注落大海，污水處理費都慳返。

圖中央位置有魚網，魚網後嘅水平線其實有一條壆，由左邊塘邊一直圍到右邊盡頭。咁樣一圍，成個泥灘就冇咩機會復原。

而家唔只係遼東灣咁圍，而係成個中國沿海都係咁圍海造地，唔使幾耐，大濱鷸數量就唔係由十幾萬隻跌到得五、六萬隻，而係跌到可能得返幾千隻，更甚者係其他水雀同樣面對住生境受破壞嘅威脅。今次親歷其景先感受到咩野係「生境被大量破壞導致物種數量大減」。

2016年5月19日星期四

遼東掠聞之二

第二日

正式工作，早上七點起身，去左一間地道嘅餐館食早餐。咸嘅豆腐花，幾碟小冷盤，最正係新鮮煎嘅小麥薄餅，堅好食!食完就坐專車去研究地點開工喇。因為此行我係大鄉里出城，好多野都係第一次做同見。同埋唔係旅行心態，所以都冇咩影到相。

強大嘅團隊!左起莎莎、Ginny大大、小弟同鶴博領導

先講講成個研究團隊先，加埋我呢個後備咕喱共五個人，兩位負責人分別係Ginny大大同鶴博領導(下稱領導)，另外仲有同我一樣都係義工嘅莎莎同陳雪，人強馬壯呀!而研究嘅主要對象就係戴左衛星追蹤器嘅大濱鷸(Great Knot)同班尾塍鷸(Bar-tailed Godwit)，至於研究目的，籠統地講就係去了解佢地嘅食性行為，泥灘底棲生物同佢地嘅關係，因此今次我都從中學習左好多雀鳥研究同保育嘅野，同埋，了解到中國沿海自然環境被破壞嘅程度，我覺得係去到一個令所有保育人士都感到絕望嘅地步。

研究地點係一個好平凡嘅泥灘，望出去就係遼東灣，唔係今次黎幫手，我真係未必會踏足東北三省。

講返今日個工作，專車拋左兩個字就去到研究地點，個度其實就係一大片泥灘，呢片泥灘位於遼寧省蓋州市西邊遼東灣，面積大概有12平方公里，聽領導講每年都吸引到幾萬隻候鳥到此休息同補給，主要有大濱鷸(Great Knot)、班尾塍鷸(Bar-tailed Godwit)、黑腹濱鷸(Dunlin)、灰斑鴴(Gray Plover)、翻石鷸(Ruddy Turnstone)、黑嘴鷗(Saunders's Gull)同白額燕鷗(Little Tern)等十幾種候鳥。

相片永遠唔可以將當刻嘅振撼場面表達出黎，只要身處其中，先可以感受到同鳥群零障礙接觸嘅感動

我主要係幫手挖泥，洗泥，而領導就要係洗完嘅樣本入面揀哂所有生物出黎，有沙蠶、各種貝類同其他軟體動物。由上午8點做到下晝4點，不斷係泥灘上面行行企企，性質都幾單一，但勝群雀不時係你前後左右起飛、掠過、或者降落，一邊聽住佢地振翅嘅聲，一邊挖泥，都幾寫意架。唯一辛苦嘅係係泥灘上走動，因為我重，行到一啲泥比較軟嘅地方就會成隻腳陷落去，最辛苦係抽返隻腳上黎果下，好多時啜得太緊，要好用力。記得第一日尾聲，潮水上漲緊，但我地仲係較外圍，要趕係水未到時上返岸，要行得快，果真係行到成日汗，而當時氣溫只係15度，淨行路已經流汗。

領導英姿!佢真係好勁，跟左大濱鷸個計劃接近10年，由每年十幾萬隻，睇住個種群跌左一大半。我話佢經過近十年嘅研究努力，成功將大濱鷸由易危推升至機度瀕危，同杓嘴鷸同級。(無錯，而家大濱鷸已經被評為極度瀕危)

Jenny大大同另外兩位義工就負責用相機接駁單筒記錄目標種嘅覓食行為。佢地都好辛苦，托住腳架跟俄仔牌85MM嘅單筒行足成日。

我地就係用呢個Sieve將啲底棲生物從泥中洗出黎。都幾好玩架，會發現好多有趣嘅蟲仔同甲殼類。

兩日都係同一個地方做同一樣嘅工作，但完成唔覺得悶同辛苦，除左行泥灘比較麻煩之外，其他事情都感覺良好。係工作同時，我地都分享交流左好多唔同嘅事情，有國內生態保育情況，仲有其他國家大事。至於係咩大事就唔好提喇，免得有人搵佢地傾計關心研究進度就唔好喇。

第二日因為被當地泥灘小惡霸驅趕，放棄左一條取樣線，所以第二日提前完成，Jenny大大佢地又未完成，我地係泥灘冇事做，只好港女自拍式消磨時間。

2016年5月18日星期三

遼東掠聞之一

第一日

5月初於Facebook睇到朋友招募義工往黃河口進行水鳥研究嘅post，當時我被黃河口呢三個字深深打動咗，而且post中提及可以涉足一啲少去嘅地點進行雀鳥調查，由於機會難得，所以我不加思索就應徵咗呢份工作。係香港用Whats App和當地研究人員溝通過後，將一切都安排妥善，就啟程前往大連。

我揀係深圳飛，除咗慳錢，仲慳時間，因為香港飛大連大部份都要轉機，淨係等轉機已經要十幾個鐘(冇錯，係十幾個鐘，即係今日飛，聽日先到)，而且價錢都唔平，所以國內航空都係去深圳飛好啲。但人算不如天算，伏真係冇處不在，當日原訂10點45上機，去到11點先上到機，諗住國內航班遲幾十分鐘上機正常。上咗機，閂咗機倉，架機開埋去跑道排隊喇，諗住會準時飛喇，嘿!少年，你真係太年輕喇，祖國一句「航空管制」，令到全機人等足兩個鐘，係機上面白坐，連飛機餐食埋都未飛得，所以唔好以為係跑道排緊隊就冇事，架機一日唔離開地面都唔好咁開心。

經歷左5個鐘加埋停揚州1個鐘，總共6個幾鐘嘅飛行旅程，腰都斷，終於到咗大連，好彩我冇寄倉行李，一落機就可以好瀟灑咁衝去坐的士，轉高鐵去蓋州。因為我班機遲咗，錯過左原本嘅高鐵班次，只好等最近個班，一等又係一個鐘。

晚上7點等到開車，全程我都唔敢訓，因為怕訓過龍，坐左一個鐘終於到站，落車就感到背脊有陣寒氣迫近，12度呀!我仲著住Birdrace果件短袖衫同短褲。出高鐵站，四野無人，伸手不見五指，想像唔到嘅荒涼。截左架的士，司機係當地東北大漢，普通話一啲都唔普通，好難聽得明佢講咩，同佢講話去果度，佢話唔識，問左幾個同行先知道，開車之後又兜錯左兩次路，最後8點先到下塌酒店，同當地研究人員會合，結束第一日。唔夠5公里嘅路程的士大哥收我廿五蚊人仔，真係好過去搶。